Prishtinë, 12 maj 2017
Myftiu i Republikës së Kosovës, Naim ef. Tërnava, i shoqëruar nga drejtori i diasporës Ekrem ef. Simnica dhe anëtarët e Kryesisë Bahri ef, Sejdiu dhe Ilmi Krasniqi morën pjesë në përurimin e xhamisë së re në qytetin Vill në Kantonin St. Gallen të Zvicrës. Në një atmosferë impozante dhe festive, të shtunën në mesditë, është realizuar ceremonia zyrtare e hapjes së xhamisë së re, në qytetin e Vil-it, para një publiku në numër të madh, të ardhur nga të gjitha anët e Zvicrës, madje edhe nga Austria, Gjermania, Italia, Danimarka e vendlindja si dhe Reisulema Sylejman ef. Rexhepi,kryetar i BFI të Maqedonisë me bashkëpunëtor. Pjesëmarrja e autoriteteve shtetërore, politike zvicerane qofshin ato lokale apo kantonale si dhe e autoritetve të kishave të ndryshme vendore, këtë manifestim e shndërronin në një tubim multikulturor e multikonfesional.
Në 12 maj në mbrëmje në sallën e qytetit Vil-it u prezantua një program i larmishëm nga shoqëritë kulturo-artistike shqiptare të Zvicrës si dhe u shfaq monodrama “Zotri Ibrahim dhe lulet e Kuranit” e interpretuar nga aktori Mirush Kabashi. E gjithë kjo ishte planifikuar në shenjë mirënjohje ndaj banorëve të Vilit për bashkëpunimin dhe mirëkuptimin që kanë treguar gjatë ndërtimit të xhamisë.
Kryetari i Kantonit të St. Gallenit, Martin Klöti përshëndeti të pranishmit me përshëndetjen origjinale Islame “Selamun Alejkum” dhe pastaj vazhdoi fjalën e tij rreth bashkëjetesës, dialogut ndërshoqëror, respektit reciprok, integrimit, mirëkuptimit dhe lirisë së shprehjes të cilat sipas tij janë vlera jetike të shoqërisë zvicerane: “Integrimi, dialogu, respekti reciprok, bashkëjetesa janë vlera të përbashkëta të cilat duhet t`i kultivojmë. Ndërsa dhuna e fundamentalizmi, janë vepra të papranueshme për shoqërinë“-tha ai.
Në këtë manifestim fjalë përshëndetëse pati edhe kryetarja e qytetit të Vilit Susanne Hartmann, prift i Kishës Katolike te qytetit të Vilit Roman Giger dhe shumë personalitete të tjera.
Myftiu Naim ef. Ternava në fjalën e tij, pasi që i përshëndeti të pranishmit në emër të Bashkësisë Islame të Kosovës dhe organeve të saja udhëheqëse,luti të Madhin Zot që të i shpërblejë të gjithë ata që kontribuuan në ndërtimin e kësaj xhamie, besojmë se kjo xhami do të reflektoi vetëm dritë, paqe, lumturi, harmoni, ardhmëri, besim reciproke, bashkëjetesë të komuniteteve në mes vete. Besojmë shumë se udhëheqësit e kësaj Xhamie do luftojnë çdo gjë që shkon në dëm të individit, familjes e shoqërisë duke bërë dallimin se punët e këqija si ekstremizmi, radikalizmi e terrorizmi nuk kanë asgjë të përbashkët me atë çka del nga mësimet e xhamive për Islamin fe, se Islami është fe që proklamon vetëm paqe. Urime të gjithëve, besoi se inaugurimi i kësaj xhamie është dhurata ma e madhe në këtë prag të muajit të Ramazanit. Myftiu shfrytëzoi nga rasti të iu urojë të gjithë besimtarëve Islam,muajin e Ramazanit . Në fund të fjalës së tij Myftiu i Kosovës, Naim ef. Ternava e shprehi urimet e tij shpirtërore duke e lutur Allahun xh.sh. për një mirëqenie sa më të mirë të mbarë njerëzisë kudo jetojnë dhe veprojnë.
