Prishtinë, më 13 mars 2023
Nën organizimin e RABITA-s dhe Këshillit Mysliman të Britanisë, si dhe me prezencën e liderëve fetarë myslimanë nga e tërë Evropa dhe liderëve fetarë të religjioneve në Mbretërinë e Bashkuar, më 12 mars 2023, u mbajt Konferenca “Ruajtja e pluralizmit fetar dhe pranimi i tjetrit në komunitetet tona”.
Konferenca filloi me leximin e disa pjesëve nga Kurani fisnik. Më pas fjalën përshëndetëse e mori drejtori i Zyrës së RABITA-s për Mbretërinë e Bashkuar dhe ShBA, z. Muath al Almari, i cili fillimisht iu dëshiroi mirëseardhje të pranishmëve në këtë takim, siç e quajti ai historik dhe të rëndësishëm për myslimanët në Evropë. Ai i vuri theks të veçantë angazhimit të zyrës rajonale për promovimin e Kartës së Mekës, si një dokument tejet i rëndësishëm për botën islame.
Të pranishmit i përshëndeti edhe deputetja për Bradfort West, njëherësh ministrja për Reduktimin e Krimit në Qeverinë e Mbretërisë së Bashkuar, znj. Naz Shah, e cila foli për sfidat e komuniteteve dhe mundësitë e bashkëpunimit ndërmjet tyre. Ajo gjithashtu foli edhe për politikat shtetërore që kontribuojnë në bashkëjetesë dhe respekt të komuniteteve.
Sekretari gjeneral i RABITA-s, dr. Abul Kerim al Isa, në fjalën e tij u fokusua në rëndësinë e bashkëpunimit ndërmjet religjioneve në përgjithësi, e në veçanti ndërmjet liderëve myslimanë. Ai foli për rëndësinë dhe objektivat e Kartës së Mekës, të nënshkruar në vitin 2019. Duke folur për këtë kartë, ai tha se një na fushat që i kushtohet rëndësi është edhe mbrojtja e ambientit, andaj edhe është themeluar iniciativa “Fetë për ambientin”. Dr. Isa ftoi të gjithë të pranishmit që ta thellojnë edhe më tej bashkëpunimin për të mirën e të gjithëve që jetojnë në këtë planet, i cili po rrezikohet çdo ditë e më shumë.
Të pranishmëve me një fjalë rasti iu drejtua edhe deputetit konservator i Parlamentit për Gillingham dhe Rainham, z. Rehman Chishti, i cili foli për domosdoshmërinë e lirive fetare në shoqëritë evropiane.
Pas sesionit të parë, u zhvillua një diskutim në panel me titullin “Diversiteti brenda feve kërkon që ne të respektojmë atë që na dallon, sepse kështu ne e nderojmë njerëzimin tonë të përbashkët”. Panelistë në këtë diskutim ishin: z. Ghaleb Bencheikh – kryetar i Konferencës Botërore të Feve për Paqe nga Parisi; shejh Yahya Pallavicni – udhëheqës i COREIS Italian – Këshilli Mysliman për Bashkëpunim në Evropë; dr. Nicholas Adams – profesor i Teologjisë Filozofike; znj. Zara Muhamed – sekretare e Përgjithshme e Këshillit Mysliman të Britanisë; rabini Jackie Tabick –president i përbashkët i Kongresit Botëror të Besimeve; dhe dr. Lakshmi Vyas – Forumi Hindu i Evropës dhe Federata e Paqes Universale.
Në këtë Konferencë, Bashkësinë Islame të Kosovës e përfaqësuan dekani i Fakultetit të Studimeve Islame, dr. Islam Hasani, shefi i kabinetit të Myftiut, mr. Besim Mehmeti dhe kapelani i FSK-së, imami Agim Gashi.
![](https://i0.wp.com/bislame.net/wp-content/uploads/2023/03/0fc803df-e87e-4f77-97e5-56e5043dc693.jpg?resize=850%2C567&ssl=1)
![](https://i0.wp.com/bislame.net/wp-content/uploads/2023/03/a55159d5-6804-4fc5-bee5-9f7214e74a8e.jpg?resize=850%2C567&ssl=1)
![](https://i0.wp.com/bislame.net/wp-content/uploads/2023/03/adcce5c2-fc81-4595-87e4-e6d31a9c3a57-1024x683.jpg?resize=850%2C567&ssl=1)
![](https://i0.wp.com/bislame.net/wp-content/uploads/2023/03/fcb181fc-a90b-47a4-949d-058a4f096d65.jpg?resize=850%2C566&ssl=1)
![](https://i0.wp.com/bislame.net/wp-content/uploads/2023/03/32585cea-9751-41ea-8f68-5d176e8069ee.jpg?resize=850%2C383&ssl=1)
![](https://i0.wp.com/bislame.net/wp-content/uploads/2023/03/aaa04dd1-f14f-4b0c-9400-cc9d7eb9be92.jpg?resize=850%2C567&ssl=1)