Prishtinë, 27 janar 2012
Myftiu i Kosovës, mr. Naim Tërnava priti sot në takim pune ambasadoren e Republikës së Turqisë në Kosovë, znj. Songul Ozan, e cila shoqërohej nga Doc. Dr. Ismet Biner – drejtor i Qendrës Kulturore Turke “Yunus Emre” që është hapur në gusht të vitit të shkuar.
Myftiu i njohu mysafirët për projektet e Bashkësisë Islame të cilat mund të jenë me interes të përbashkët për studiuesit dhe shkencëtarët e dy vendeve, duke nisur me projektin e dorëshkrimeve të vjetra Islame në gjuhet arabe dhe osmane, pastaj projekti i monografisë së xhamive të Kosovës etj.
Myftiu Tërnava theksoi se realizimi i këtyre projekteve ka rëndësi të veçantë ngase po bëhen për të parën herë në Kosovë dhe kjo tregon më së miri kujdesin për ruajtjen dhe trajtimin e trashëgimisë kulture islame.
Ambasadorja turke, znj. Songul Ozan, e inkurajoi Myftiun për punën e madhe që po bënë Bashkësia Islame e Kosovë për ruajtjen dhe mbrojtjen e trashëgimisë islame. Projektet që po realizoni ju, janë projekte shumë të rëndësishme për të gjithë.
Me drejtorin e qendrës “Yunus Emre”, Dr. Ismet Biner, Myftiu diskutoi mundësinë e realizimit të projektit të digjitalizimit e dorëshkrimeve të vjetra të Bibliotekës së Bashkësisë Islame të Kosovës.
