Të gjithë haxhilerët nga Kosova janë shëndosh e mirë, dhe janë duke i kryer obligimet e Haxhit. Dje ishin në rrafshnaltën e Arefatit, ku qëndruan tërë ditën, dhe ku myftiu Naim ef. Tërnava mbajti një ligjëratë për Haxhin, dhe ku u lut që Zoti të na i pranojë duatë dhe lutjet tona. Ai aty na e kujtoi se Arefati është një ditë mjaft me vlerë, ku haxhilerët nga e tërë bota tubohen duke bërë ibadet dhe duke iu përgjigjur Allahut me “lebejkellahu me lebejk”, gjithnjë duke kërkuar prej Zotit që të na i falë mëkatet dhe të na shpërblejë me të mirat e Tij.
Allahu me krijimin e njeriut të parë e caktoi që ne t’i bëjmë ibadet dhe lutje Atij, dhe për këtë në Kuran thotë: “Me të vërtetë e para shtëpi ku njeriu në të dhe përreth saj i bën ibadet Zotit e ngritur për njerëzit është në Beke (Meke)” Myslimanët po ashtu në këto ditë kujtojnë edhe sakrificën e Ibrahimit a.s., me të birin e tij Ismailit a.s., si dhe mësimet që dalin nga ajo histori e papërsëritur njerëzore. Duanë e Arefatit para haxhilerëve të Kosovës e beri hoxha Mahmut Arnauti, kurse me perëndim të diellit haxhilerët janë nisur për Muzdelife, ku kanë falur namazin e akshmit dhe jacisë, kurse më pas janë nisur për Mine, ku kanë hedhur guralecët pas lindjes së diellit, e më pas janë vendosur në hotelin e tyre. Aty ata kanë vazhduar të pushojnë për një kohë, e më vonë kanë bërë tavafi sadrin dhe sa’jin.
Lusim Zotin që t’i pranojë lutjet, që bota të jetë në paqe dhe qetësi!
Meke 12.9. 2016
