Ballina Fjalime Urimi i Myftiut të Kosovës, Naim ef. Tërnava me rastin e festës së Fitër-Bajramit

Urimi i Myftiut të Kosovës, Naim ef. Tërnava me rastin e festës së Fitër-Bajramit

Prishtinë,  4 korrik 2016
Të nderuar besimtarë
Vëllezër e motra!
Nesër më 05 korrik 2016 është dita e parë e Fitër – Bajramit, e cila vjen si rezultat i kryerjes së një prej obligimeve më madhore të fesë sonë, një nga kushtet e Islamit, agjërimit të muajit të bekuar të Ramazanit, muajit të Kuranit, të sakrificës, përkushtimit e devotshmërisë së shtuar në adhurim, ndaj Krijuesit të gjithësisë. Ndaj më lejoni që në emër të Kryesisë së Bashkësisë Islame të Republikës së Kosovës, organeve dhe institucioneve të saja dhe në emrin tim personal t’ju uroi për festën e Fitër- Bajramit, për dëshirat më të mira për ju dhe familjet tuaja.

Nesër në agimin e hershëm shumë nga besimtarët tanë do të nisën për në xhami, të gëzuar e të motivuar si asnjëherë më parë, për ta kurorëzuar agjërimin me faljen e namazit të Bajramit.
Kjo ditë e Bajramit e cila vjen pas një sakrifice të madhe vetëm për Zotin Krijues, me të drejt shpresojmë në shpërblimin nga i Madhi Zot. Ditë e cila rritë edhe më besimin te Zoti dhe shpresën për një jetë më të mirë, duke e ditur se festa e Bajramit është festa më e bekuar për besimtarët islam.
Është festa e sakrificës, e devotshmërisë, bamirësisë, solidaritetit, unitetit e bashkimit dhe mirësisë.  Gëzim, lumturi, bashkim, urtësi, paqe sjell për të gjithë ne kjo festë e Fitër- Bajramit, duke e pasur në hatër se kjo festë na çliroi nga ndjenja e hezitimit, e dobësisë e vuajtjes, dyshimit, duke forcuar besimin tonë në Zotin Krijues.
 
Allahu xh.sh., thotë:
 “E, s’ka dyshim se ata që thanë: “All-llahu është Zoti ynë”, dhe ishin të paluhatshëm, atyre u vijnë engjëjt dhe u thonë: të mos frikësoheni, të mos pikëlloheni, keni myzhde xhenetin që u premtohej. Ne kujdesemi për ju, si në jetën e kësaj bote, ashtu edhe në botën tjetër, kudo të keni atë që dëshironi dhe gjithçka që kërkoni” Fusilet:30-33.
 
Të nderuar besimtarë!
 
Nëpër familjet tona edhe gjatë kësaj feste të përhapim ndjenjën e vëllazërisë, mirësisë e dashurisë me njëri tjetrin, të kemi shëndet, harmoni e lumturi. Urimet me njëri tjetrin, vizitat nëpër familjet tona, janë tradita që duhet ndjekur për të shprehë vëllazërinë, bujarinë e sinqeritetin me njeri tjetrin, për të uruar dhe gëzuar kësaj feste kaq të rëndësishme.
Sot kur feston bota mbarë, sot kur zemrat tona janë edhe më afër me njeri tjetrin, sot kur mëshira e Allahut xh.sh., është shpërndarë si asnjëherë më parë mbi besimtarët, sot kur shumë fytyra janë të gëzuara dhe presin që nesër do të jen në përqafim me prindërit dhe të afërmit e tyre për të uruar për festën e Fitër – Bajramit. Ta lusim Allahun për faljen e mëkateve dhe shpërblimin me të mirat e Tij.
Në këto momente festive kudo shtrihet dora e mëshirës, kjo festë nëpër familjet tona mbjellë gëzimin e harenë, forcon vëllazërinë dhe dashurinë mes njerëzve, na rikujton për kujdesin e vazhdueshëm që duhet të kemi edhe në këto momente festive për varfanjakët, të sëmurët, të pa aftit për punë dhe për të gjithë ata që janë në nevojë.
Festa e Fitër Bajramit njeriun e rikthen edhe njëherë në përkushtimin edhe më të madh ndaj Krijuesit, të cilin e shprehim përmes adhurimeve të shumta të cilat e pastrojnë dhe e motivojnë shpirtin edhe më shumë për vepra të mira, duke pastruar atë nga egoja, urrejtja, pangopësia, zilia e xhelozia, duke e udhëzuar në vepra të mira dhe respekt me njëri tjetrin.
 
 
Të nderuar vëllezër e motra!
Për një moment le të na kujtohen shumë fëmijë e familjar të cilët këtë festë përkundër dëshirës së tyre nuk mund ta festojnë nëpër vatrat e tyre të cilat janë të përfshira në luftë. Vuajtjet e fëmijëve dhe të pa fajshmëve në luftën në Siri e Irak nga dora vrastare e njerëzve kriminel në Mijan Mari e shumë qendra tjera ku fëmija është viktimë e terrorit të ushtruar nga grupe e qeveri të ndryshme. Ta thërrasim ndërgjegjen e strukur jashtë kodit moral që duhet ta ketë çdo qenie njerëzore, ta rizgjojmë atë dhe të ndalen këto krime nëpër botë, të shpëtoj ajo që mund të shpëtohet dhe të përgatisim një të ardhme sa më të mirë për të gjithë. 
Në fund më lejoni që edhe njëherë  tua uroi festën e Fitër Bajramit të gjithë vëllezërve dhe motrave tanë, brenda trojeve tona etnike dhe në mërgatë kudo që gjenden.
E lus Allahun xh.sh., që ti mëshiroi të gjithë ata të cilët jetën e tyre ia falën Zotit për fenë dhe atdheun e tyre.
Me fat festa e Fitër- Bajramit!
 
Myftiu i Kosovës
Naim ef. Tërnava

Shfaq më shumë artikuj të ngjashëm
Shfaq më shumë në Fjalime

Shfleto

Urimi i Myftiut me rastin e fillimit të muajit të Ramazanit

Prishtinë, 26 maj 2017 Urimi i Myftiut të Kosovës, Mr. Naim Tërnava për besimtarët dhe qyt…