HYRJE

Edukimi i fëmijëve është bërë një temë e cila duhet të trajtohet me prioritet për arsye të shumta. Për shkak të përgjegjësisë që kemi individualisht si prindër, por edhe si shoqëri. Fenomenet negative në mesin e fëmijëve janë duke u shtuar dita-ditës dhe, nëse nuk organizohemi në nivel shoqëror për t’i luftuar ato, atëherë të gjithë ne, në një ose në formë tjetër, do t’i vuajmë pasojat për shkak të shpërfilljes së përgjegjësisë. Së këndejmi, hutbeja që do ta mbajmë sot, vjen me mesazhin për t’u kujdesur për edukimin e fëmijëve tanë, me qëllim të eliminimit të këtyre fenomeneve që po prekin gjeneratën e re, por edhe me thirrjen për institucionet tona që të bashkërendojmë forcat për t’i shpëtuar ata nga dukuritë negative.

FËMIJËT STOLI E KËSAJ JETE

Dashuria për fëmijët është ndjenjë e lindur natyrshmërisht tek njeriu. Fëmijët janë gëzim dhe kënaqësi, janë stoli e jetës së kësaj bote (Kur’ani: Kehf, 46).

Kjo ka bërë që edhe të Dërguarit e Allahut (paqja qoftë mbi ta!) të shfaqin dashuri për fëmijët. Pejgamberi Zekerija a.s., qe lutur:

﴿ وَزَكَرِيَّا إِذْ نَادَىٰ رَبَّهُ رَبِّ لَا تَذَرْنِي فَرْدًا وَأَنتَ خَيْرُ الْوَارِثِينَ ﴾‏

“(Përkujto) Edhe Zekerijanë kur e luti Zotin e vet: “Zoti im, mos më lë të vetmuar se Ti je më i miri trashëgues (pas çdokujt).” [Kur’ani: Enbija, 89]

EDUKIMI I FËMIJËVE KËRKESË DHE DETYRIM HYJNOR

Meqë fëmijët janë dhuratë hyjnore, atëherë edhe përkujdesja për ta është detyrë e shenjtë dhe përgjegjësi për secilin prind. Kjo edhe për shkak të rolit të pazëvendësueshëm që ka prindi në edukimin e fëmijës së vet. Roli i prindit, siç na mëson Pejgamberi Muhammed a.s., është vendimtar në përcaktimin e rrugës të cilën do ta ndjek ai fëmijë. Bazuar në këtë, Kur’ani na urdhëron që të kujdesemi për familjen:

﴿ يَا أَيُّهَا الَّذِينَ آمَنُوا قُوا أَنفُسَكُمْ وَأَهْلِيكُمْ نَارًا وَقُودُهَا النَّاسُ وَالْحِجَارَةُ ﴾‏

“O ju që besuat, ruajeni veten dhe familjen tuaj prej një zjarri, lëndë djegëse e të cilit janë njerëzit dhe gurët…” [Kur’ani: Tahrim, 6]

Këtë përgjegjësi në edukimin e fëmijëve na e kujton edhe Pejgamberi Muhammed a.s., i cili thotë: “Të gjithë ju jeni kujdestarë dhe të gjithë ju do të përgjigjeni për ata që kanë qenë në përgjegjësinë tuaj.” [Hadithin e shënojnë Buhariu dhe Muslimi]

Disa dijetarë, duke dashur të na kujtojnë obligimin e madh që kemi ndaj edukimit të fëmijëve, kanë thënë se Allahu do ta pyes në Ditën e Kiametit prindin për fëmijën para se ta pyes fëmijën për prindin.

BASHKËPUNIMI NDËRINSTITUCIONAL PËR EDUKIMIN E FËMIJËVE

Edukimi i fëmijëve nuk është vetëm përgjegjësi e prindërve, por është përgjegjësi edhe e shoqërisë, respektivisht institucioneve tona edukativo-arsimore. Fakti se kohëve të fundit janë shfaqur kaq shumë dukuri negative në mesin e fëmijëve tanë, duhet të na alarmojë të gjithëve, dhe të na vë në lëvizje për të gjetur zgjidhjet më të mira për këto dhe probleme të ngjashme që për bazë kanë edukimin.

Prindërit, duhet të jenë në vijën e parë të frontit dhe për asnjë moment të mos ndalen së punuari me fëmijët e tyre, derisa shteti duhet të ndërtojë politika arsimore-edukative që në fokus kanë jo vetëm arsimimin, por mbi të gjitha edukimin e fëmijëve.

E patjetër këtu një rol ta pazëvendësueshëm kanë prijësit fetarë të komuniteteve fetare në Kosovë, që me këshillat e tyre mund të asistojnë shumë në ruajtjen e karakterit dhe personalitetit të fëmijëve në secilën etapë të zhvillimit të tyre.

E kemi thënë sa e sa herë dhe do ta përsërisim se zgjidhja më e mirë është edukimi fetar. Asgjë nuk mund ta zëvendësojë edukimin fetar. Çdo vonim në aprovimin e edukimit fetar në shkolla është me pasoja. Ndaj, le të jetë kjo një thirrje për institucionet tona qeverisëse që ta marrin në konsideratë futjen e edukatës fetare në shkolla, ashtu siç veprojnë një numër i madh i shteteve në perëndim. Le të jetë ky një mesazh i yni kundër këtyre dukurive negative që po prekin fëmijët tanë!

Shfaq më shumë në Hytbe

Shfleto

UNIFIKIMI I FJALËVE DHE RADHËVE NË KOHË KRIZASH

Me rekomandim të kryetarit të Kryesisë së Bashkësisë Islame të Kosovës, Myftiut Naim ef. T…