Prishtinë, më 28 tetor 2024
Kryetari i Bashkësisë Islame të Kosovës, Myftiu Naim ef. Tërnava, ka pritur në takim një delegacion të Qendrës për Studime të Larta të Islamit, Shkencës dhe Qytetërimit të Malajzisë, i përbërë nga drejtori i kësaj Qendre, dr. Mohd Hilmi Bin Ramil dhe ish-drejtori, tanimë profesor i kësaj Qendre, dr. Khalif Muammar A. Harris.
Myftiu Tërnava fillimisht iu uroi mirëseardhje në institucionin e Bashkësisë Islame të Kosovës, e më pas i njohu ata me punët dhe aktivitetet që zhvillon Kryesia e Bashkësisë Islame, sidomos në fushën akademike. Ai nëpërmes tyre falënderoi shtetin e Malajzisë për përkrahjen e vazhdueshme dhënë për Kosovën në fusha të ndryshme.
Myftiu gjithashtu falënderoi mysafirët edhe për angazhimin e tyre për ta thelluar bashkëpunimin në fushën akademike ndërmjet Qendrës së tyre dhe Fakultetit të Studimeve Islame në Prishtinë.
