Myftiu Tërnava mori pjesë në Forumin për vlera të përbashkëta të pasuesve të religjioneve të ndryshme

Prishtinë, më 11 maj 2022

Me ftesë të sekretarit gjeneral të Ligës së Botës Islame (RABITA), dr. Muhamed Abdulkerim al-Isas, kryetari i Bashkësisë Islame të Kosovës, Myftiu Naim ef. Tërnava, mori pjesë në Forumin global të vlerave të përbashkëta të pasuesve të religjioneve të ndryshme, i cili po mbahet në kryeqytetin e Arabisë Saudite, në Rijad.

Në këtë takim po marrin pjesë mbi 70 liderë nga gjitha religjionet, si islame, krishtere, hebreje, budiste, hinduse etj.

Në hapjen e takimit, një fjalë rasti mbajti sekretari gjeneral i RABITA-s, dr. Muhamed Abdulkerim al-Isa, i cili fillimisht u dëshiroi mirëseardhje të pranishmëve, duke theksuar rolin dhe rëndësinë e secilit pjesëmarrës në këtë takim. Ai përmendi gjithashtu nevojën dhe rëndësinë e koordinimit dhe bashkëpunimit me përgjegjësi të lartë në përhapjen e tolerancës dhe bashkëjetesës, si dhe për luftimin e urrejtjes fetare në çdo cep të botës.

Në hapje të Forumit, foli edhe kryepeshkopi i Kostandinopojës, patriarku Ekumenik Bartolomeo, i cili falënderoi RABITA-n për iniciativat e tilla, duke ftuar kështu të gjithë pjesëmarrësit që të kontribuojnë dhe të punojnë me ngulm për dialog dhe bashkëjetesë, pa marrë parasysh sfidat e kohës moderne.

Kryetari i Këshillit të Fetvasë së EBA-së, Abdullah bin Beja dhe Myftiu i Egjiptit, dr. Shevki Alam, theksuan rëndësinë e bashkëpunimit në mirësi dhe ndalim të së keqes. Thellimi i bashkëpunimit mbi vlerat e përbashkëta, rëndësia e respektimit të besimeve dhe bindjeve fetare, ishin ndër pikat e rëndësishme që përmendën kryetari i Këshillit të Fetvasë dhe Myftiu i Egjiptit.

Një fjalë rasti në këtë Forum, mbajti edhe përfaqësuesi i Vatikani, Monsinjor Haled Ukashe.

Në këtë Forum, të pranishmëve iu drejtua edhe Myftiu i Kosovës, Naim ef. Tërnava, i cili në fjalën e tij paraqiti përvojën dhe traditën e popullit shqiptar në bashkëjetesë dhe tolerancë ndërmjet besimeve të ndryshme. Theks të veçantë në fjalën e tij, Myftiu Tërnava, i kushtoi edhe përkushtimit të Bashkësisë Islame të Kosovës në edukimin, vetëdijësimin dhe promovimin e paqes, tolerancës dhe bashkëjetesës ndërmjet besimtarëve në Kosovë.

Vlen të theksohet se në këtë Forum, Myftiu Tërnava, është i vetmi përfaqësues i bashkësive islame të Evropës Lindore.

Myftiu Tërnava në këtë Forum po shoqërohet nga shefi i kabinetit të tij, Besim ef. Mehmeti.

Shfaq më shumë në Lajme

Shfleto

Imami i Qabesë fali namazin e xhumasë në xhaminë “Sulltan Mehmet Fatih” në Prishtinë

Prishtinë, më 30 shtator 2022 Imami i Qabesë, Abdullah Avad el-Xhuheni, ka falur sot namaz…