Prishtinë, 21 shkurt 2014
Myftiu i Kosovës, Mr. Naim Tërnava priti sot ambasadorin jorezident të Suedisë në Kosovë, Mats Staffansson i cili shoqërohej nga i ngarkuari me punë në Ambasadën suedeze në Prishtinë, Henrik Nilsson.
Myftiu fillimisht u shprehu mirëseardhje në selinë e Bashkësisë Islame si dhe falënderoi ambasadorin për vizitën.
“Më lejoni që në emër të BIK dhe besimtarëve të Kosovës edhe njëherë të falënderoj shtetin dhe popullin suedez për ndihmën e mbështetjen që i keni dhënë në vazhdimësi Kosovës. Ne do jemi mirënjohës gjithmonë për ndihmën tuaj”- tha, përveç tjerash, Myftiu Tërnava.
Myftiu, po ashtu, e njohu ambasadorin suedez edhe me rrjedhat e zhvillimet për jetën fetare në vend, si dhe me sfidat që ballafaqohet BIK.
Ambsadori Staffansson, falënderoi myftiun për mikpritjen dhe për angazhimin e tij personal dhe kontributin e BIK për bashkëjetesën, tolerancën dhe kultivimin e dialogut mes komuniteteve për një jetë sa më të mirë të të gjithë besimtarëve në vend pa dallim etnie a besimi.
