Prishtinë, 26 nentor
Komiteti Ndërkombëtar i Kryqit të Kuq (KNKK) në bashkëpunim me Kryesinë e Bashkësisë Islame të Kosovës (BIRK), organizuan punëtori për të Drejtën Humanitare Ndërkombëtare dhe të Drejtën Islame në Lidhje me Konfliktin e Armatosur. Në këtë workshop morën pjesë kryetari i BIRK-ut, Myfiu Naim ef. Tërnava, përfaqësuesi rajonal i Komitetit të Kryqit të Kuq Ndërkombëtar me seli në Sarajevë z. Klement Mahmud, shefi i misionit të KNKK-së në Kosovë Agim Gashi, kryetar të këshillave të BI-së, kryeimamë, profesorë nga Fakulteti i Studimeve Islame, profesorë nga Medreseja Alauddin, Bashkësia Fetare Islame e Maqedonisë së Veriut, zyrtarë të KNKK-së nga Sarajeva e mysafirë të tjerë.
Fjalën hyrëse e mbajti Myftiu Naim ef,Tërnava i cili falenderoi KNKK-në që në bashkëpunim me BIRK-un po organizojnë këtë workshop që ështē tejet i rëndësishëm. E çmoj dhe e vlerësoj lart organizimin e kësaj konference që për temë ka parimet që parasheh e drejta ndërkombëtare dhe e drejta islame në konfliktet e armatosura, respektivisht në luftëra.
Ne, si Bashkësi Islame e Kosovës, dhe unë si Myfti i saj, kemi pranuar me kënaqësi që të jemi bashkorganizator dhe të japim kontributin tonë modest në sqarimin e opinionit për parimet dhe konditat që ka dhe që kultivon e mëson feja islame në raport me konfliktet e armatosura respektivisht luftërat.
Po ashtu, ne do të njohim këtu edhe normat dhe parimet e së drejtë ndërkombëtare përkitazi me çështjen në fjalë.
“Ç’është e vërteta, feja islame luftën e sheh vetëm si mundësi të fundit për të mbrojtur integritetin, vendin, popullin, besimin e kulturën nga armiku, vetëm atëherë kur janë shterur të gjitha mundësitë për të shmangur konfliktin-luftën.
Thënë shkurt, sipas fesë islame, lufta paraqet një “obligim të padëshiruar” e që duhet vënë në zbatim, duke mbajtur dhe pasur parasysh vlerat e veçanta njerëzore dhe morale dhe që mund të përdoret në ato raste kur ajo është e pashmangshme. Në rastin e një konflikti, besimtarët duhet të luftojnë vetëm nëse lufta është e nevojshme, nëse kundërshtarët sulmojnë dhe nëse nuk mbetet asnjë zgjidhje tjetër” – theksoi Myftiu Tërnava.
Ai po ashtu tha se Islami promovon paqen, tolerancën dhe respektin e ndërsjellë dhe vetë emri Islam është paqe.
Më pas, workshopi vazhdoi me kumtesa, Ragmi Destani nga Bashkësia Islame e Kosovës paraqiti trajtesën e tij me temën”Përdorimi i forcës sipas së drejtës islame” kurse përfaqësuesi rajonal të Komitetit të Kryqit të Kuq Ndërkombëtar me seli në Sarajevë z. Klement Mahmud, u paraqit me kumtesën “Sfidat e konflikteve të armatosura bashkëkohore në kontekstet islame”.
Workshopi do të vazhdojë punën edhe nesër.
