Prishtinë, 18 nëntor 2016
Kryesia e Bashkësisë Islame të Kosovës organizoi konferencë shkencore “Revista “Dituria islame”-tri dekada jetë, punë, sfida dhe suksese ” kushtuar 30 vjetorit të daljes së kësaj reviste. Në këtë konferencë morën pjesë studiues e hulumtues nga Kosova,Shqipëria, Maqedonia dhe më gjerë. Hapja solemne e konferencës u bë më 18 nëntor 2016 në ambientet e hotelit “Swiss Daimon” në Prishtinë , ku të pranishëm ishin Myftiu i Bashkësisë Islame të Kosovës Naim ef. Tërnava, Kryeministri i Republikës së Kosovës, z.Isa Mustafa, Kryetari i Bashkësiës Fetare Islame të Maqedonisë Sulejman ef.Rexhepi, kryetari i Komunitetit Mysliman të Shqipërisë, Skender Bruqaj, Ipeshkvi i Kosovës, Dodë Gjergji etj.

Me intonimin e himnit të Kosovës dhe himnit kombëtar dhe me një pjesë nga Kurani të lexuar nga Vedat ef. Sahiti u hap konferenca. Mysafirëve mirëseardhje u dëshiroi sekretari i Kryesisë së BIRK-ut, Resul ef. Rexhepi, i cili, ndër të tjera, tha: “…Po promovojmë dhe po festojmë bashkë vlerat dhe punën e shkëlqyer që ka mbjellë dhe kultivuar një varg i tërë i krijuesve, dijetarëve, shkencëtarëve, poetëve, shkrimtarëve, gazetarëve dhe i dashamirëve të fjalës së shkruar dhe ky varg është shumë i gjatë dhe vështirë i numërueshëm”. Myftiu i Republikës së Kosovës mr.Naim Tërnava mbajti fjalim përshëndetës.

“Sonte para jush t’ju drejtohem, t’ju përshëndet dhe t’ju falënderoj në emër të Kryesisë së BIRK-ut, në emër të institucioneve dhe të organeve të saj, si dhe në emrin tim personal për praninë tuaj për shënimin e një përvjetori të rëndësishëm për kulturën tonë kombëtare e fetare – në 30-vjetorin e veprimtarisë së suksesshme të revistës “Dituria islame”. Jemi mbledhur sot, në këtë manifestim, për të vlerësuar dhe për të nderuar angazhimin, punën, përkushtimin, vizionin, dijen dhe kontributin e të gjithë atyre që punuan për tri dekada në rritën, zhvillimin dhe formësimin e revistës “Dituria islame”, dhe përmes saj përçuan tek popullata, vlerat hyjnore, humane, kombëtare e kulturore. Prandaj, me këtë rast, shpreh mirënjohjen më të sinqertë dhe konsideratat më të thella për drejtuesit – kryeredaktorët, redaktorët dhe për të gjithë bashkëpunëtorët e revistës “Dituria islame”. Një mirënjohje të veçantë në këtë përvjetor, gjithsesi e meritojnë lexuesit tanë të nderuar nga të gjitha viset shqiptare dhe diaspora, të cilët, me interesimin dhe besnikërinë e tyre për revistën “Dituria islame”, ishin dhe vazhdojnë të jenë garancia më e fuqishme dhe motivi kryesor për punën dhe angazhimin tonë”,-tha, ndër të tjera, Myftiu Tërnava.

Kryeministri i Republikës së Kosovës z.Isa Mustafa e ka quajtur përvjetor të rëndësishëm jo vetëm për komunitetin islam, por për Kosovën, duke e cilësuar atë një revistë e cila ka lënë gjurmë të thella në etikën fetare dhe kombëtare të Kosovës. “Në kohë shumë të vështira, ashtu siç u tha edhe këtu, revista “Dituria islame” ka përmbushur një mision tepër të rëndësishëm ndaj popullsisë në Kosovë dhe jo vetëm në Kosovë, duke qenë në shërbim të informimit, edukimit dhe të orientimit të tyre. Ne kemi nevojë të kultivojmë respektimin e vlerave njerëzore, kemi nevojë të kultivojmë tolerancën ndërmjet njerëzve, ndërmjet popujve, ndërmjet religjioneve, të kultivojmë trashëgiminë tonë të përbashkët kulturore dhe fetare, të mbrojmë parimet e një bote të lirë, të respektojmë të drejtat e njeriut dhe të drejtat fetare. Unë mendoj se Bashkësia Islame e ka dhënë një shembull të shkëlqyer këtu dhe kemi pasur një tolerancë, një bashkëjetesë dhe një bashkëpunim të mrekullueshëm edhe me komunitetet e tjera fetare dhe vetë prania e Ipeshkvit sot këtu flet për një bashkëpunim të thellë dhe për një lidhje kombëtare që e kemi ne, duke respektuar edhe specifikat religjioze. Natyrisht se shumë nga këto vlera më parë i kemi ruajtur dhe trashëguar falë kësaj reviste, e cila ka lënë gjurmë dhe ka dhënë një kontribut të jashtëzakonshëm, prandaj uroj që revista të vazhdojë edhe më tutje frymën e saj”,- tha kryeministri Mustafa.

Kryetari i KMSH-së, H. Skender Bruçaj, në fjalën përshëndetëse për konferencën shkencore “Revista “DITURIA ISLAME” – tri dekada jetë, punë, sfida dhe suksese”, theksoi sakrificat për të investuar në arsim, kulturë dhe për edukimin e brezave të rinj. “Dijetarët myslimanë shqiptarë historikisht janë bazuar në fjalën e parë të Zotit në Kur’an “lexo”, dhe me këtë moto ata i kanë edukuar edhe brezat ndër shekuj, duke i brumosur me dije dhe dituri, me atdhedashuri dhe arsim, duke e bërë çdo xhami shkollë ku mësoheshin jo vetëm edukata dhe mësimet fetare, por edhe gjuha shqipe, tregues i së cilës është edhe ruajtja e saj në historinë tonë të trazuar kombëtare. Revista “Dituria islame” lindi në Kosovë në një kohë sakrificash dhe sfidash të mëdha, për bashkësinë e myslimanëve të Kosovës, të cilët nën pushtimin njëshekullor i mbijetuan presionit, persekutimit dhe privimit të lirisë, duke investuar dhe sakrifikuar çdo gjë për arsimin, kulturën dhe edukimin e brezave të rinj”,- tha ndër të tjera kreu i KMSH-së.

Nga ana e tij, Ipeshkvi i Kosovës, Dodë Gjergji, në fjalën e tij u shpreh se kjo ngjarje është e rëndësishme për Ju, po e vlerësueshme edhe nga ana jonë, sepse janë 30 vjet përpjekje për të shqipëruar mendimin islam në gjuhën tonë të dashur shqipe, e cila na bashkon dhe na vëllazëron të gjithë, pa marrë parasysh besimin. “Revista jonë “Drita” dhe Revista Juaj “Dituria islame”, kanë qenë “kandil drite dhe diturie”, që janë përpjekur të ndriçojnë mendjen dhe zemrën e besimtarëve tanë në errësirën e një shoqërie ateiste dhe një shteti komunist. Shkëlqimi i kësaj drite i nevojitet besimtarit tonë, pa marrë parasysh fenë”-tha Ipeshkvi Gjergji.

Kryetari i Bashkësisë Fetare Islame të Maqedonisë H.Sulejman ef.Rexhepi në fjalën e tij duke uruar këtë përvjetor thekoi se në këtë tridhjetë vjetor revista përforcoi identitetin fetar dhe kombëtar të popullatës së Kosovës. ”Me plotë të drejtë Bashkësia Islame e Kosovës mburret që e ka organ të vetin këtë revistë kurse ne shqiptarët në tërësi dhe myslimanët mburremi që e e kemi revistë shumë të dashur dhe tepër të lexuar me endje dhe qejf. “Dituria islame” megjithë problemet dhe sfidat me të cilat u ballafaqua përgjatë daljes së saj në kohën e okupatorit serb, megjithatë dalëngadalë arriti që të profilizohet duke u shndërruar në një tryezë gjithëpopullore ku u shkrua mendimi islam në gjuhën shqipe dhe prej teologëve e shkencëtarëve myslimanë të vendit, por edhe nga jashtë. Lexuesi shqiptar nisi të njihet me një botë të pakufishme islame “ ”-tha reisi Rexhepi.

Kurse prof. dr. Zejnullah Gruda dhe kryredaktori aktual Dr. Ajni Sinani mbajtën nga një referat kushtuar historikut dhe rëndësisë së revistës “Dituria islame” . Kurse më 19 dhe 20 nëntor konferenca vazhdoi punimet në sallën e Kryesisë së BIRK-ut, ku u mbajtën shtatë seanca shkencore me 50 studiues dhe punonjës shkencorë. {gallery}dituria30{/gallery}

Shfaq më shumë në Lajme

Shfleto

Myftiu Tërnava mori pjesë në iftarin e shtruar nga emiri i Katarit

Prishtinë, më 18 mars 2024 Me ftesë të emirit të Katarit, shejh Temim bin Hamad al Thani, …