Prishtinë, 3 shtator 2018
Kryetari i Bashkësisë Islame të Kosovës, Myftiu Naim Tërnava priti në takim drejtoreshën e qendrës për religjione dhe profesione nga Shtetet e Bashkuara të Amerikës, prof. dr. Debra L. Mason. Pasi i shprehu mirëseardhje dhe e falënderoi për vizitën, Myftiu Tërnava e njohu znj. Mason me organizimin e jetës fetare në vend, si dhe me aktivitetet e institucioneve të Bashkësisë Islame të Kosovës. Ai theksoi rolin dhe angazhimin e Bashkësisë Islame të Kosovës që në Kosovë të mbretëroi një ambient i qetë, ku të gjitha komunitetet mund të jetojnë në paqe dhe harmoni mes vete.
Nga ana e saj, znj. Debra Mason, falënderoi Myftiun Tërnava për mikpritjen dhe çmoi lart kontributin e Myftiut dhe Bashkësisë Islame të Kosovës që po jep në zhvillimin e jetës fetare në Kosovë.
Znj. Mason është profesoreshë emeritus në Fakultetin e Gazetarisë të Missour-it, ku ligjëron mbi njohuritë religjioze për gazetarët dhe bashkëpunon me një sërë organizatash ndërfetare në SHBA dhe botë.
