Prishtinë, 13 korrik 2021
Kryetari i Bashkësisë Islame të Kosovës, Myftiu Naim ef. Tërnava, priti sot në takim ambasadorin e Bashkimit Evropian në Kosovë, z. Tomas Szunyog.
Myftiu Tërnava i uroi mirëseardhje ambasadorit, njëherësh e uroi për detyrën e re, duke i dëshiruar punë të mbarë dhe të suksesshme në këtë mision. Ai gjithashtu e falënderoi atë dhe nëpërmes tij edhe tërë Bashkimin Evropian për ndihmën dhënë Kosovës ndër vite. Myftiu Tërnava më pas e njohu mysafirin me punët dhe angazhimin e institucionit të Bashkësisë Islame të Kosovës, si dhe me sfidat që ballafaqohet ky institucion.
Nga ana e tij, ambasadori Szunyog, shprehu falënderime për pritjen dhe njëherësh përgëzoi Myftiun Tërnava dhe Bashkësinë Islame të Kosovës për kontributin e tyre që në Kosovë të mbretërojë paqja, respekti e toleranca ndërmjet besimeve dhe etnive të ndryshme.
Gjatë takimit u diskutua edhe për një sërë temash me rëndësi për të qytetarët e Kosovës.
