I nderuari ipeshkv, Dodë Gjergji
Me nderim e respekt të posaçëm, në këtë ditë të shënuar për besimtarët e krishterë, më lejoni që t’ju drejtohem me mesazh urimi e përgëzimi Ju, meshtarëve tuaj, si dhe të gjithë vëllezërve shqiptarë të besimit të krishterë, duke ju dëshiruar gjithë të mirat, me shëndet, mbarësi e lumturi!
Festa e Kërshëndellës është moment i veçantë për besimtarët e krishterë, për t’u kujtuar e festuar, sepse në zanafillën e saj ka jetën, shpresën e mbarësinë.
Tashmë dihet, festat fetare te ne janë të shtresuara thellë në identitetin tonë, sikurse besimet tona, dhe si të tilla janë çaste që krijojnë kushte e premisa për reflektim, solidaritet e humanizëm. Po ashtu festat fetare përgjatë historisë sonë kanë përçuar unitet, dashuri, mirëkuptim e harmoni, vlera këto që tashmë e identifikojnë popullin tonë.
Zotni Ipeshkv, përmes jush uroj e përgëzoj edhe gjithë praninë ndërkombëtare katolike në Kosovë!
Duke ju përshëndetur, ju dëshiroj shëndet, mbarësi e lumturi!
Prishtinë, 24 dhjetor 2024
Me respekt,
Myftiu i Kosovës,
Naim ef. Tërnava
