Kryeimami Bajgora mbajti ligjëratë në Sallën e Kulturës “Mensur Zyberaj” në Rahovec

Prishtinë, 23 nëntor 2018

Me rastin e shënimit të muajit të Mevludit, Këshilli i Bashkësisë Islame i Rahovecit, mbajti manifestim kushtuar këtij muaji në Sallën e Kulturës “Mesur Zyberaj” në Rahovec . Ky manifestim siç e do rendi filloi me leximin e ajeteve të Kuranit, ndërsa më pas një fjalë rasti e mbajti kryetari i Këshillit të Bashkësisë Islame të Rahovecit z. Shani Sylka, i cili përshëndeti të pranishmit dhe uroi për këtë muaj, duke e veçuar këtë muaj si një nga më të rëndësishmit në kalendarin islam, pasi në këtë muaj lindi krijesa më e mirë që shkeli në tokë.

Ligjëratën kryesore e mbajti kryeimami i Republikës së Kosovës z. Sabri Bajgora, i cili tha se fjalët janë të pafuqishme për të shprehur madhështinë e Pejgamberit a.s. “Lindja e tij erdhi si burim frymëzimi i shumë gjeneratave të kaluara dhe të sotme, erdhi në kohën kur prangat e skllavërisë kishin mbërthyer zemrat e robëruara të njerëzimit, erdhi atëherë kur çdo ndjenjë e moralit ishte venitur. Më në fund, në mesin e një bote të shprishur e të pashpresë, lindi dielli i të gjithë pejgamberëve, i cili ngrohi zemrat e atyre që ishin në amulli e mjegull”, tha Bajgora.

Ai duke folur për cilësitë e Pejgamberit a.s. shtoi se: “Muhamedi a.s. ishte mësues fetar, reformator shoqëror, udhëheqës moral, mik besnik, shok i mrekullueshëm, bashkëshort i devotshëm dhe baba i dashur.”

“Përshkrimin më të denjë të Muhamedit a.s. e gjejmë në Kuran, në të cilin Allahu tregon vlerat më të mirëfillta me të cilat përshkruhet një qenie njerëzore. Allahu në Kuran thotë: “Ju në të dërguarin e Allahut kishit shëmbëlltyrën më të mirë.” (El Ahzab, 21). Personaliteti i tij paraqet baraspeshë të materies dhe shpirtërores, aftësisë dhe diturisë, ai arriti që fjalën e Zotit ta aplikonte më së miri në jetë”, shtoi ndër të tjerash kryeimami Bajgora.

Ai gjithashtu foli edhe për personalitetin e tij nga këndvështrimi i historianëve, filozofëve, shkencëtarëve, nga ku përmendi faktin se të gjithë këta, disa në heshtje e disa haptazi e pranuan faktin se asnjë nuk është i barabartë me pejgamberin tonë Muhamedin a.s. për kontributin e madh dhe gjurmët që i la ai në historinë e jetës.

Manifestimi u përmbyll me një program kulturo-artistik me ilahitë të kënduara nga vëllezërit Allajbeg.

Shfaq më shumë në Lajme

Shfleto

Drejtori për diasporë Ekrem Simnica priti në takim Xheladin Leka imam në Zvicërr

Më 22 shkurt Drejtori për diasporë në Kryesinë e Bashkësisë Islame të Kosovës, Mr. Ekrem S…