"Të gjithë qytetarëve dhe besimtarëve të Republikës së Kosovës ua uroj festën e Bajramit të Vogël.

Bajrami i Vogël është ditë e sakrificës për të mirën, për paqen dhe lumturinë e të gjithë njerëzve, është ditë e besimit në Zotin, ditë e mirëkuptimit, e nderimit dhe dashurisë për njëri-tjetrin.

Sivjet këtë festë po e kremtojmë në Republikën e pavarur dhe sovrane të Kosovës, të njohur dhe të pranuar gjerësisht nga familja e madhe e vendeve demokratike anekënd globit.

Republika e Kosovës është shembull i shkëlqyeshëm i tolerancës dhe bashkëjetesës së besimeve të ndryshme. Kultura e mrekullueshme fetare dhe pasuria shpirtërore e popullit të vendit tonë është garanci e fuqishme se kjo bashkëjetesë do të jetojë përherë.
Prandaj, kjo festë e shënuar le të shërbejë si një rast për t’ua zgjatur dorën e ndihmës e të solidaritetit të përhershëm të gjitha familjeve e individëve që kanë nevojë për ndihmën e tjetrit. Vetëm duke u ndihmuar të tjerëve kjo ditë e përçon mesazhin e saj të vërtetë.

Me fat Bajrami i Vogël!

Zoti e bekoftë Republikën e Kosovën dhe popullin e saj të qytetëruar!
 

* * *

Telegrami i Presidentit Sejdiu për Kryetarin e Bashkësisë Islame të Kosovës, z. Naim Tërnava

I nderuari z. Naim Tërrnava,

Kryetar i Bashkësisë Islame të Kosovës,

"Me rastin e festës së Bajramit të Vogël, Ju shpreh urimet e mia më të sinqerta dhe të popullit të Republikës së Kosovës.

Në këtë ditë të festës dhe të sakrificës, e çmojmë shumë punën Tuaj shpirtërore për paqe, mirëkuptim dhe tolerancë në mes besimtarëve dhe tërë qytetarëve të Republikës së Kosovës, për lirinë dhe pavarësinë e së cilës Ju  dhe institucioni që drejtoni keni dhënë aq shumë.

Këtë vit, festën e Bajramit të Vogël po e presim në Kosovën e pavarur dhe sovrane dhe kjo e bën edhe më të veçantë këtë ditë të afrisë dhe dashurisë njerëzore.

Duke ju dëshiruar shëndet dhe paqe, ju lutem, z. Kryetar, pranoni ndjenjën e konsideratës sime më të lartë.