Prishtinë, 25 gusht 2008

Myftiu i Kosovës mr. Naim Tërnava ka takuar sot në Prishtinë sekretarin e shtetit të Turqisë Mustafa Said Jaziciogu me të cilin biseduan për zhvillimet në Kosovë pas pavarësisë së vendit.
Myftiu Tërnava e ka falënderuar sekretarin e shtetit turk për përkrahjen e parezervë që ka dhënë qeveria dhe populli turk për Kosovën si para ashtu edhe pas pavarësisë së vendit.

Myftiu Tërnava vuri në pah rolin që është duke e luajtur diplomacia turke në sensibilizimin e qeverive arabo - islame për njohjen e pavarësisë së Kosovës.
Sekretari i shtetit të Turqisë në bisede me Myftiun u shpreh se edhe në të ardhmen qeveria dhe diplomacia turke sidomos në kuadër të Konferencës së vendeve islamike do të loboj për njohjen e shtetit të Kosovës.
Myftiu Tërnava dhe sekretari i shteti biseduan edhe për gjendjen e monumenteve të trashëgimisë materiale islame që janë ndërtuar në Kosovë gjatë kohës së Perandorisë Osmane.
Sekretari i shtetit të Turqisë u shpreh se qeveria e tij është e gatshme që në bashkëpunim me institucionet e Kosovës të ndihmoi në rinovimin dhe restaurimin adekuat të objekte me vlerat kulturore të trashëgimisë islame në Kosovë.
Në takim u bisedua edhe për marrëdhëniet dhe bashkëpunimin  në mes dy bashkësive islame asaj të Turqisë dhe Kosovës të cilat u vlerësuan si shumë të mira.