Në këtë konferencë ndërkombëtare teologë, studiues e analistë të feve të ndryshme kryesisht të fesë islame e krishtere biseduan për nevojën e dialogut ndërfetarë, ndërkulturor e ndëretnik.
Në hapje të konferencës qenë të pranishëm shumë personalitete të njohur nga Amerika, Azia e Evropa. Këtu Kosova u përfaqësua nga Myftiu mr. Naim Tërnava i cili para të pranishmëve mbajti kumtesën për traditën e tolerancës ndërfetare tek shqiptarët.
Në hapje të konferencës folën prof. Gjozef Koming, Prof.Volf, presidenti i universitetit “Yell” Richard Levin si dhe princi jordanez Dr. Gazi bin Muhamed bin Tala.
Në punimet e konferencës qenë të pranishëm studiues të njohur të feve si Dr. Robert Shuller, Habib Ali El-Xhifri, Rabini Bret Oksman, prof.dr.Husejn En Nasr e shumë të tjerë.
Gjatë qëndrimit në Nju-Jork Myftiu Tërnava takoi shumë personalitete të njohur që qenë të pranishëm në konferencë si me princin jordanez Dr. Gazi bin Muhamed bin Tala, rektorin e Universitetit të Yell-it Richard Levin, Ministrin e Çështjeve Fetare të Alxherisë, këshilltarin e parë politik të sekretarit të Konferencës Islamike e shumë personalitet të njohura.
Nga takimet e shumta të Myftiut Tërnava do veçuar takimin me senatorin amerikan ish-kandidatin për president nga radhët e demokratëve Xhon Keri, i cili edhe hapi punimet e konferencës.
Në takim me senatorin Keri Myftiu Tërnava pasi e ka falënderuar senatorin për ndihmën dhe kujdesin e vazhduar amerikan ndaj Kosovës, e ka njohur atë me traditën e kultivimit të tolerancës ndërfetare nga populli shumicë i Kosovës.
Myftiu Tërnava senatorin Keri e ka njohur edhe me angazhimet e bashkësive fetare tradicionale të Kosovës (asaj islame e katolike) për gatishmërinë e tyre për të kontribuar për një klimë më të mirë mes komuniteteve fetare e nacionale që jetojnë në Kosovën e pavarur.
Myftiu Tërnava foli edhe për të arriturat e Kosovës së pavarur si dhe për rolin që duhet të luajnë udhëheqësit fetar në afrimin e komuniteteve të Kosovës.
Ndërsa në sesionin plenar të konferencës Myftiu Tërnava  ka mbajtur kumtesën për perspektivën e fesë në Kosovë, në të cilin myftiu ka vënë në paha rolin që ka feja në shoqërinë bashkëkohore.
Myftiu Tërnava foli për traditën e kultivimit të tolerancës ndërfetare në Kosovë. Gjithashtu në fjalën e tij Myftiu Tërnava foli edhe për nevojën e intensifikimit të dialogut ndërkonfesional e ndërnacional.
Në fjalën e tij Myftiu Tërnava foli edhe për të arriturat e Kosovës së pavarur si dhe për rolin që duhet të luajnë udhëheqësit fetar në afrimin e komuniteteve të Kosovës.
Fjala e Myftiut Tërnava nga të pranishmit u përcoll me interes të veçantë.