Ballina Lajme Mbahet akademi përkujtimore me rastin e kalimin në ahiret të hoxhës Kasim ef. Gërguri(1970-2019)

Mbahet akademi përkujtimore me rastin e kalimin në ahiret të hoxhës Kasim ef. Gërguri(1970-2019)

Prishtinë, 21 mars 2019

Kryesia e Bashkësisë Islame të Kosovës organizoi akademi përkujtimore me rastin e kalimit në ahiret të Kasim ef. Gërgurit, ish-drejtorit Financiar në këtë Kryesi. Kjo akademi u mbajt në amfiteatrin e Fakultetit të Studimeve Islame në Prishtinë dhe në të morën pjesë kryetari i Bashkësisë Islame të Kosovës, Myftiu Naim ef. Tërnava, dekani i FSI-së, prof. dr. Fahrush Rexhepi, drejtori i Medresesë, Jakup Çunaku, familjarë, bashkëpunëtorë, koleg, përfaqësues të këshillave të BI-së, studentë, shokë etj.

Në fjalën e tij drejtuar të pranishmëve, Myftiu i Kosovës, Naim ef. Tërnava, tha se e kam shumë të vështirë të flasë për nxënësin, studentin dhe kolegun e punës, Kasim ef. Gërgurin. “Edhe kjo fjalë e imja sot këtu para jush, për mua është pjesë e atyre sprovave të mëdha, që në një rrethanë tjetër, kurrë nuk do ta kisha përzgjedhur dhe nuk do të isha pajtuar, pra që të kujtoj e nderoj nxënësin, mikun, kolegun e bashkëpunëtorin tim të vyer, Kasim ef. Gërgurin, i cili me caktimin e Allahut xh.sh., me datën 15 mars 2019, kaloi në ahiret, duke na lënë ne mërzitur e të pikëlluar dhe duke lënë një zbrazëti e boshllëk në mesin tonë. Mirëpo, caktimit të Allahut ne i themi vetëm amin dhe atë e pranojmë me plotë besim, nënshtrim dhe durim të thellë, sepse me urdhrin dhe caktimin e Allahut besimtari duhet të pajtohet plotësisht. Kasim efendiun e kam njohur, i kam përcjellë sukseset dhe punët e tij dhe e kam vlerësuar këtu e tri dekada e gjysmë më parë, pra saktësisht që nga viti 1985, si nxënës në Medrese dhe deri në ditët kur ai u nda fizikisht nga ne. Kjo njohje e jona u takon tri periudhave të ndryshme, Kasimi si nxënës, si student dhe si koleg e bashkëpunëtor. Në detyrën e drejtorit financiar, Kasim efendiu dha një kontribut të çmuar për avancimin e programeve profesionale në fushën e financave, trajnimeve dhe përgatitjen e stafit jo vetëm këtu në qendër, por edhe në të gjitha këshillat e BI-së dhe në institucionet e tjera që veprojnë në kuadër të Bashkësisë Islame të Kosovës. Ai qe i afërt me bashkëpunëtorët, modest me të tjerët, parimor në punë, e mbi të gjitha korrekt e bashkëpunues me të gjithë. Ajo që e ka bërë të veçantë Kasim efendiun, duhet ta themi se ka qenë institucionalist i përkushtuar, që do të thotë se i ka dashur e respektuar institucionet dhe është angazhuar për to. Shpeshherë e thoshte me bindje, ne shyqyr Zotit i kemi krijuar institucionet tona, këto duhet respektuar. Madje edhe në derset e ligjërimet e tij, ai gjithherë vëmendje të posaçme u kushtonte forcimit të institucioneve si në kuadër të BIRK-ut, ashtu edhe të institucioneve publike e shtetërore të vendit. Si pedagog, bashkëpunëtor e bashkudhëtar i Kasim efendiut, me bindje e them se përkushtimi, urtësia e besnikëria ishin virtytet kryesore të Kasim efendiut”, tha ndër të tjerash Myftiu Tërnava.

Për periudhën sa ishte nxënës në medresenë Alaudin, foli kujdestari i Kasim efendiut, prof. Ruzhdi Shabani. “Do të kisha dëshiruar që Kasim efendiu të ishte sot në vendin tim dhe ai të fliste për profesorin e tij, por ja që caktimin e Zotit askush nuk mund ta ndryshojë. E kam pasur nxënës, ashtu siç i pata edhe të tjerët, por ai ishte shumë i dashur, korrekt, fytyrëqeshur. Me shokët ishte shumë i afërt dhe sado që të flasim për virtytet e tij, forcën dhe anën pozitive që kishte, është pak, por unë e lus Zotin që Kasim efendiun ta shpërblejë me shpërblimin e Tij”, tha profesor Shabani.

Kasim efendiu ishte personalitet që respektoi shokët dhe kolegët, e ndër shokët më të afërt të tij ishte edhe Bahri ef. Sejdiu, i cili para të pranishmëve evokoi momente nga shoqëria e tij me Kasimin, që nga viti i parë në Medrese, pastaj gjatë shërbimit ushtarak, si dhe momente nga jeta studentore në Aman të Jordanisë, e krejt në fund edhe si nëpunës i BIRK-ut, në të cilin dallohej me karakterin e tij intelektual dhe që e donte institucionin dhe vijën zyrtare institucionale. “Ai do të na mungojë të gjithëve në institucionin tonë të BIRK-ut, seminaret dhe takimet tona, në shkrimet nga sfera e akadit, si dhe familjarëve në përgjithësi”, tha mes tjerash Bahri ef. Sejdiu.

Në këtë akademi të pranishmëve me një fjalë iu drejtua edhe bashkëluftëtari i Kasim efendiut, komandant Mensur Kasumi, i cili çmoi guximin dhe trimërinë e Kasim efendiut gjatë luftës së fundit të UÇK-së. “Njeriu i parë që më është bashkëngjitur në luftë ka qenë hoxha i nderuar Kasim efendiu. E kam dashtë dhe e kam respektuar shumë, sepse ai na jepte moral dhe këshilla. Ka qëndruar së bashku me mua në një bunker për një javë pa lëvizur aspak dhe çdo çast e luste Zotin që të dy të jemi në mesin e dëshmorëve. Por deshi Zoti që të jetojmë edhe më dhe ja që vdekja e tij sot na pikëllon shumë. Kasimin e krahasoj me veprimtarë të mëdhenj të çështjes kombëtare dhe fetare të shqiptarisë, e këso burra rrallë lindin.”

Në emër të familjes, të pranishmit i përshëndeti i biri i rahmetliut, Enes Gërguri, i cili falënderoi Myftiun Tërnava dhe BIRK-un për organizimin e kësaj akademie përkujtimore. Krejt në fund të kësaj akademie, u bë edhe duaja e hatmes, të cilën për Kasim efendiun e kanë lexuar kolegët e tij të punës. Këtë dua e bëri Agim ef. Hyseni.

Shfaq më shumë në Lajme

Shfleto

Konferenca Ndërkombëtare për Paqe dhe Solidaritet në Paris

Prishtinë, 17 shtator 2019 Sot filloi punën Konferenca Ndërkombëtare për Paqe dhe Solidari…