Prishtinë, 31 maj 2016
Myftiu i Republikës së Kosovës, Naim ef. Tërnava, priti në një takim ambasadoren e Republikës së Finlandës në Kosovë, e znj. Anne Huhtamäki, si dhe mysafirin nga Finlanda, z. Pekka Metso-ambasador koordinues për procesin dialogues ndërkulturor dhe ndërfetar njëherazi do të jetë folës në Konferencën për Dialogut Ndërfetar, që do të fillojë sot në Prishtinë.
Myftiu Tërnava, pasi u dëshiroi mirëseardhje mysafirëve, të njëjtët i informoi me historikun e Bashkësisë Islame të Kosovës dhe me aktivitetin që BIK-u zhvillon në shkallë vendi. Ai po ashtu theksoi se Kosova ka një harmoni fetare dhe është një shoqëri tolerante, ku secili manifeston besimin e vet lirshëm, dhe këtë kulturë bashkëpunimi institucioni i BIK-ut do ta vazhdojë edhe në të ardhmen.
Nga ana e saj ambasadorja e Republikës së Finlandës në Kosovë, znj. Anne Huhtamäki, falënderoi myftiun Tërnava për pritjen, dhe vlerësoi e çmoi kontributin që po jep BIK-u rreth tolerancës dhe dialogut ndërkulturor dhe ndërfetar.
